اللقاءات والحوارات
حوار على أرض الواقع ((مصطفي يتحدى البطاله بعربية فول جده ووالده ويرى أنها شركه وابناء اسرة الحاج ابراهيم موظفين فيها)))
-بن الخامسه والعشرون
يتحدى البطاله
بعربية فول موروثه عن اجداده ووالده .
________________________________________
بدأ الشاب المكافح مصطفي إبراهيم حديثه بكلمة
(((( عربية الفول شالت عني الحمول))))
وهكذا مصطفى الشاب المجتهد يتوارث مهنة بائع الفول
على عربيه من اجداده ووالده دون خجل
________________________________________
عرفنا بنفسك؟؟
أنا اسمي مصطفي من الفيوم عندي 25 سنه
وعايش في القاهره ببيع فول وبروح الفيوم كل فتره عشان اشوف اهلي.
_______________________________________________________
مصطفى أنت متزوج؟
لا أنا متجوزتش بس عندي شقتي في البلد
والحمد لله عايش كويس ولسه مبفكرش
في الجواز دلوقت اما أكون نفسي واشطب شقتي العروسه سهله
وأحنا بنتجوز من بنات بلدنا دي عادتنا وعادات اجدادنا.
______________________________________________________
ليه أختارت مهنة بائع فول ؟
عشان دي مهنة اجدادي ووالدي وخالي يعني مهنة العيله كلها
كانت كل العيله بتشتغل على نفس العربيه دي متغيرتش
______________________________________________________
معقول نفس العربيه ليه هي العربيه دي عمرها أد أيه يا مصطفي؟؟
العربيه بقالها 40 سنه ناس ماتت وناس اتولدت وهي مبتتغيرش
______________________________________________________
ياتري بتمثل ايه لك عربية الفول؟؟
دي شركه يا أستاذه..... العيله بتعين كل شبابها عليها يعني
رؤسائها ابويا وجدي وخلاني
______________________________________________________
الله برافو عليك أنا بحيي الشباب المجتهد
اللي ذيك وياريت كل الشباب يعملوا ذيك كده من غير خجل
______________________________________________________
ممكن تقول أيه للشباب اللي بيشتكي من البطاله؟
بقولهم انزلوا اشتغلوا اي شغله الشغل مش عيب بدل قاعدة القهاوي
وبدل ما تمد أيدك لأبوك وتقوله هات
______________________________________________________
يعني من وجهة نظرك سواء الشاب معه شهاده او لا
يبحث بنفسه عن شغل؟
أيوه انا مكملتش تعليم بس مش عشان كده واقف على عربية الفول أنا
كنت هقف على العربيه حتى لو كان معايا شهاده
ولو خيروني بين الف شغله مش هختار غير مهنة اجدادي اللي كبرتني من خيرها يعني
العربيه دي لها فضل عليا وعلى عائلتي كلها
برده هشتغل نفس الشغله
______________________________________________________
وطب ايه سبب عم استكمال دراستك؟
والله السبب أن المدارس في الفيوم مستواها التعليمي
وحش أبويا اتعقد معلمناش وكان صعب وقتها عيال صغيره
تقعد لوحدها في القاهره وبعدين عندي اخويا اتعلم وبرده اشتغل على عربية الفول معايا
______________________________________________________
لو جاتلك فرصة سفر لأي دوله هتسافر؟
أنا مش هكذب هسافر بس والله برده هشتغل بتاع فول
وهكون سعيد لو خدت العربيه دي معايا
______________________________________________________
وسندوتش الفول وصل سعره كام دلوقت؟؟
الرغيف 2 جنيه
وكل طلب حسب سعره في طلب اطباق فول مخلل ب14 جنيه
كل زبون حسب طلبه وحالته الماديه تبع طلبات الزبون يعني
______________________________________________________
وهل لك مواعيد عمل؟
طبعاً هو في شركه من غير مواعيد ذي ما قلت لحضرتك
دي الشركه بتاعتنا--هههههههه
أنا بقف من الفجر بخرج بعد صلاة الفجر
لحد الساعه 3 العصر ولو الفول مخلص بكمل المهم ابيع كله
______________________________________________________
يعني دخلك بالنسبه للغلاء اللي بيشتكي منه كافي ؟
ايوه الحمد لله مش بحوش بس عايش كويس كفايه اني مبمدش ادي لحد
وانا مرتاح ماديا ونفسيا والحمد لله حصلتلي ظروف وواجهتها الحمد لله
______________________________________________________
طيب يا مصطفي بجد أنا سعيده وفخوره جداً بحواري معاك
وبتمنى انك تكون قدوه لكل شاب ويتعلموا منك الشباب العزيمه والصبر
واسيبك بقى لزباينك الناس مستنيه الفطار
اشكر حضرتك
واخر كلمه بقولها بحبك يا مصر ويا شعب مصر أنزل أشتغل وكفايه كسل اخرجوا
عشان نفسكم وعشان بلدكم .
______________________________________________________
_شكراً مصطفي رسالتك ان شاء الله وندائك هيوصل لكل الشباب_
بنتمنى لك التوفيق يا مصطفى
____________________________________________________
كتبته---الإعلاميه حنان خلف أبوالوفا
17-9-2017
الأحد
ليست هناك تعليقات:
إرسال تعليق